VətənDaş
"Vətən daşı olmayandan, olmaz ölkə vətəndaşı” Məmməd Araz
İndi zəmanə başqadı. Hər kəs öz xeyrini güdür. Yəni ki, vətənə "Baş” olmaq "Daş” olmaqdan daha sərfəli olduğundan, kimin əlinə fürsət düşür keçib oturur yuxarı başda. Fikirləşən də yoxdur ki, axı bu yuxarı başda oturmaq üçün gərək adamın heç olmasa özünün normal başı olsun. Muasir dövrdə başı pul ilə əvəz etmək çox asan bir iş olduğundan, "başsız” olmağı heç problem sayanda yoxdu. Bir də ki, "başsız” yuxarı başda oturmağın insanın özünə bir ziyanı yoxdur axı; Şair X.Rəsuloğlu demişkən: ”Başda olanların başı yoxdursa, daş düşəcək aşağıda olanların başına”. Düzü bizim başımıza daş o qədər düşüb ki, artıq öyrəşmişik hər ölçüdə daşa. Hətda QARABAĞ boyda daş belə bizə təsir etməyi bacarmır. Düzü bəlkədə təsir edir? Ola bilər bu daşların təsiridi ki, daşbaşdan başqa heç nə fikirləşə bilmirik. Vətən düşmən tapdağı altında biz vətəndaşlar isə... Görəsən nə üçün biz beləyik? Yoxsa vətəndaşlarımıza vətən anlayışı artıq müqəddəs görünmür? Deyəsən, zəmanə dəyiydiyindən, başı daşdan-daşa dəyən xalqımız müqəddəs Vətəni "vətəndaşları” ilə qarışıq salır.
P.S. Hörmətli şairimiz Məmməd Araz Bəy, bilirsiz indi biz sizin misralarınızdan istifadə edib, hamımız daş olmağa çalışırıq ki, səsimiz çıxmasın. Birdən dəyib dolaşan olar. Onsuzda vətənə siz deyən daşdan olanların mükafatı başdaşı olur.
Müəllif: Nuranə Heybətova
|