Yəqin xatırladız. Dəhşətli gün idi. Saat 08:30 idi biz Latın dili dərsinə gedirdik. Həmişəki kimi ilk Universitet illərinin kefini çıxarmağa çalışırdıq. Hələ geydiyimiz ağ xalata ağ papağa tam öyrəşməmişdik. Dərsin axırlarına yaxın qrup yoldaşıma zəng gəldi, icazə alıb çölə çıxdı. İçəri girəndə rəngi sapsarı idi. Dedi Neft Akademiyasında atışma olub. Bir an özümü itirdim. Can dostum Tural orada oxuyurdu, əziz sinif yoldaşım Davud orada idi. Dəli kimi oldum. Tez çölə çıxdım. 1-saylı şəhər xəstəxanası (Semaşko) tərəfdən kəsilməz ambulans səsi gəlirdi. Özümdən asılı olmadı. O tərəfə qaçdım. Turala zəng edirdim. Xətlər dolu idi. Lap dəli oldum.Eləbil havadan sıl qalmışdım. Ayaqlarımı yerə vurduğumu, Necə qaçdığımı hiss eləmədim. Semaşkonun həyəti tələbələrlə dolu idi. Hamı bir-birindən hadisənin təfərrüatlarını öyrənməyə çalışırdı. Mənsə Turalı axtarırdım, Bəlkə izdihamın arasındadır o da deyə fikirləşirdim. Birdən telefonum zəng çaldı. Tural idi. O an ona nə demişəm indi heç cür xatırlayammıram. Mənə yaxşı olduğunu, Davudun yaxşı olduğunu, narahat olmamağımı söylədi. Gələcəyin həkimi olacaq tələbə yoldaşlarımla nəsə etmək, yararlı olmağa çalışırdıq. Xəbər gəldiki yaralılar üçün qan lazımdı. Lazımi qan qruplarını axtarmağa başladıq. O otaq, o Mühazirə zalı qalmamışdı ki girməyək. Çalışırdıq tələbə qardaşlarımıza kömək edək. Axı onlarda hansısa bir ananın quzusu idi. Göz yaşlarımızı çətinliklə saxlayırdıq. Siqaret belə qəhərimiz boğmağa kömək etmirdi. O gündən sonra nə vaxt ambulans səsi eşitsəm ürəyim əsir. O uşaqların valideyinləri gözümün qabağına gəlir. Çox pis oluram. Fikirləşirəm ki oturub boşboş müzakirə etmək, yada unudub əhli kef olmaq lazım deyil. Çalışmaq lazımdı ki, savadlı, cəsur, dünyaya səs sala biləcək insan olsan. Çünki bizə bunları edənlərə ən layiqli cavab onlara hökm edə biləcək səviyyəyə çatmaqdır. Allah o uşaqlara rəhmət eləsin. Valideyinlərinə səbr versin. O valideyinlər bilsinlər ki, onların uşaqlarının qanı belə yerdə qalmayacaq. Gələcəyin savadlı vətəndaşları olacaq olan müasir Azərbaycan gənci çalışacaq ki bir də belə hadisələr xalqımızın başına gəlməsin, analar ağalamasın...
|